Dan kengkawh ngam sorkar kan mamawh

Mamit district-a Kawrthah leh Rengdil inkarah tun hnai khan dan loa phurh kuhva rah ip eng emaw zat man a ni a, hengte hi hak ral a ni. Hetih lai hian, Hachhek Bial Kuhva Chingtu Pawl (HBKCP) chuan an hnuaia association/society-te chu kuhva rah an manin, an duh anga action lak phalsak an nih thu an hriattir.

Kuhva smuggling avangin Mizo leh Mizo kan intin ta uai uai mai hi thil pawi tak a ni. Kuhva rah to lakluh hi dan kalh a ni tih hre chungin sorkarin a 'mit a siai' a, chu mai ni loin chhiah lakna atan a hmang hial a ni. He smuggling hi ualau taka kalpui niin mi tam takin an hausakpui tawh a, nghawng ṭha lo a neih theih avangin mipui an au chhuak ta a ni ber mai. Sorkar hian a en lian deuh mai mai hnuah a khap leh hnuhnawh a, thil kal dan a buai zo ta a nih theih ang.

Chhungkaw eng emaw zatin kuhva rah tawlhruk hi eizawnna ang maiin an lo hmang laklawh tawh a, an sum lakluhna tawp thut hi a kalpui chhunzawm dan an zawng ta zêl a ni.

Hei hian nghawng ṭha lo tak a neih chu Mamit District leh Kolasib District chhunga kuhva huan neituten a hralhna kawngah harsatna an tawk a, smuggler vangin kuthnathawktute eizawnna a buai a, hei vang hian kuhva rah tawlh ruk veng turin an duty ta hial a ni.

HBKCP-in kuhva rah mante chunga action lak danah an hnuaia mite chu ṭha an tih anga che mai turin an hriattir ta a, sorkar a inrawlh ngam a ṭul hle mai. Kan ram kal dan en mai hi chuan a chang chuan sorkar nei lo kan ang ṭhin a, kuhva rah tawlh ruk a nih laiin kan hre lo der tawh a, kuhva rah man duh anga tih riral tumna hial awmin sorkar hi sorkar a nih ngam a ngai e.