Mizote sa ei duhzawng versus dan

Mizoram State Animal Welfare Board (MSAWB) chu an chairman Ah & Vety hoin tun hnai khan an ṭhukhawm a, ui talh leh ui sa zawrh a tlem zawk theih nan The Mizoram Animal Slaughter (Amendment) Act chu a taka kalpui an rél a, ui sa zuar tih rêm nan ui talh leh a sa zuar ṭhinte lakah a ṭul anga complaint thehlut turin MSAWB-in hma la se, an ti.

Khawvelah ui sâ ei ṭhin hnam hi ṭhahnem tak an awm a, chu'ng zingah chuan Mizote pawh an tel. Hetih lai hian sa kan ei ṭhin zingah hian ui hi a ngainatute ngainat hlawh ber ran a nih hmel a, bawng, vawk, kel leh arte nen chuan khaikhin chi a ni lo ang. Ui hi chu chhungkaw tam takin an chhungkaw zinga tel ve ang maia duat leh hmangaih taka an enkawl a ni a, ui sâ ualau taka zawrh hi an tán pawh hmuh a hrehawm hle ngei ang.

Hetih lai hian hnam hrang hragin kan ei leh in duhzawng hi a inang lo thluah a, khawvel hmun ṭhenkhata an ei ṭhin chu hmun danga an duh loh leh ten em emte a ni thei. Sakhaw inzirtirna zawng pawhin ṭhenkhat tán vawk sâ hi sa tenawm leh ei thiang lo a ni a, sakhaw ṭhenkhat tan bawng sa ei thil thiang lo a nih mai bakah bawng talh khapna dante pawh kalpui a ni mêk bawk.

Kan awmna hmun, kan sakhaw biak leh kan hnam azirin ei leh chungchangah hian a danglam thei hle tih kan hriat a ṭha a, mi tam tak eizawnna hi chutah chuan a innghat ve bawk tih pawh hriatthiampui a ṭha ang. Hei vang hian dan kenkawh tum luatah kan hnamin kan ei ṭhin te, kan sakhaw inzirtirna kalh ni lem loah hi chuan zau zawka thil thlir thiam a ṭha a, MSAWB thu rel The Mizoram Animal Slaughter (Amendment) Act a taka kalpui tum pawh hi inhnial theih tak thil a nih hmel e.