Thlangtu mipuite zah thiam

ZPM chuan thuchhuah siamin, Tlangpui khuaa ZPM party aṭanga VC atana thlan tlinte chu deputy chief minister-in MNF-a inlet turin a thlêm niin an tarlang a; mipui thlan tlin hruaitute uire tuma bei loin, ram hmangaihna nen thawk se, thliar bik nei loin ram mipui tan rawngbawl se an duh thu an sawi. 

ZPM thuchhuah siam hi thil dik a nih leh nih loh hriat ni lo mah se, tun hmaa Mizorama thil lo thleng tawhte ngaihtuah chuan thil mak tak pawh a ni lo. Mizoramah hian mipuiin an duh an thlan vek tawh hnuah 'danin a phuar lo' tih vanga VC member-te an awmna political party insawn ta mai hi an awm ṭhin a, hei hi chin zui loh a ṭha khawp mai. 

Tun hnaia India ram politics-a thil duhawm lo tak mai chu MLA-te lei theih ang maia an khawsa ṭhin hi a ni a, a bikin BJP lam hi hetianga political party dang MLA-te lei tumna kawngah hian an hmingchhe hle. Hetiang politics thianghlim lo tak mai hi Mizoramah seng lut lo hram ila, ruling party lamin eptu lam VC member hi an lo thlem tak tak a nih chuan a zialo hle ang. 

Mizorama kan MLA-te zingah pawh a thlangtu mipuite'n an thlan tlinna party chhuahsan duh avanga term hmang tluan loa bang tate kan nei a, hengte thleng pawh hian politics-a thil thiang kan tih hi mihing chenhonaah chuan thil chhuanawm tak a ni zui lem ṭhin lo. 

ZPM lam hian deputy chief minister an dem thu an chhuah rual hian an VC member-te pawh party danga inlet mai lo turin fuih ṭha se; a thlemtu lam an demawm rual hian a thlemtu lamin an thlem thluk zung zung theih khawtlang hruaitu nih hi a zahawm lo. Mipui thlan chhuahte hian MLA-ah a ni emaw, munical corporation leh VC thlengin a thlangtu mipui hi an zah thiam a pawimawh takzet a ni.