Ruihhlo kalkawng ven ṭhat a ngai

Champhai District Narco Coordination Centre (NCORD) Committee chu tun hnai khan an ṭhukhawm a; tun hnai ni 55 chhungin Champhai district-ah ruihhlo kaihhnawih thubuai 27 ziah luh a ni a, mi 45 man an ni tih tarlan a ni a; April 28 aṭanga June 21 thleng khan Champhai district-ah police-te'n Rs 13,72,68,000 hû heroin kg. 5.51 an man a, Excise & Narcotics department-in Rs 7,52,580 hû heroin gram 627 an man.

Mizorama ruihhlo hlauhawm tak hluar em em mai heroine hi khaw chhak aṭanga lo lut a ni a, Myanmar-ah tualchhung politics buaina avangin vengtu sipai pawh an awm mumal lo a, hei vang hian ruihhlo hi a lo lut thla tam zual niin a lang. Myanmar leh India (Mizoram) inkarah Myanmar lamin sipai duty pawh an dah tawh mang lo a, Mizoram lamah kan veng ṭha tawk bawk si lo a, ruihhlo a hluar ta hi thil mak a ni lo.

Ruihhlo lo lut hi nghei harsa leh a ngawl vei awl em em mai; heroine a nih miau avangin kan ram hian a chhiatpui nasa ta hle mai a, tun ang zela a hluar phei chuan kan ṭhalaite hma lam hun hi a ngaihtuahawm takzet a ni. kan sorkar hian hei hi chonaah ngai se, thil tih tur pawimawh tam tak zingah Myanmar aṭanga ruihhlo lo lut tur ven hna hi tun aia khauh zawkin thawk se a ṭha ngawt mai.