VC/LC inthlan leh vote thi

State Election Commission chuan August 27 khan Village Council 324 leh Local Council 50-ah inthlan an buatsaih a, Covid-19 hri lêng avanga inthlan buatsaih theih lohna hmun eng emawzat a awm bawk. 

Tun ṭum inthlan hi hri lêng kara inthlan a nih miau avangin thuneitute lam pawh mipuiin thui tak an hrethiam ngei ang a, chuti ni lo se phun leh sawiselna tur a awm nual mai. Mipui zirtirna an puangzar ṭha tawk lo a, traditional media an tih mai television, radio leh chanchinbu lama mipui zirtirna hmuh tur a tam tawk lo.

Hei hian nghawng chiang taka a neih chu vote thi tam lutuk hi a ni a, kan inthlan danah candidate an tam bawk nen a buaipui a hautak ang bawkin voter tan pawh a buaithlak. Mi pangngai tak china ngaih zingah pawh vote thlak dan kal hmang hre chiang lo an awm a, politics ngaihven tak mi nih loh chuan kum nga dana vawi khat vote thlak a nih avangin VC/ LC inthlan dan an hre chiang lo hi dem tur an ni lo ang. 

Hmun tam takah vote thi zat hi candi­date tlin leh tlaknaa inthlauhna aiin a säng zawk a, vote thi awm lo se result danglam thei tur a awm nual a ni. Vote thlaktu lamin an zir loh vang awm bawk mah se, a zirtirna lam kan tiṭha tawk lo tih hi chu phat theih a ni lo ang. 

A buaipuitu sorkar official lama lungawi lo leh phun neuh neuh hi chu inthlanna dangah pawh a awm tho a, ngaimawh tham leh tihtawp ngai chu vote thi zat hi a ni ang.