Inthlan dawna thutiam

Congress party chuan, MNF Sorkar chu an sorkar chhungin zêldin thu leh insawi hlim chawpin hun an hmang tluan nia sawiin, kum 2018 inthlan dawna an thutiamte an tihlawhtling thei dawn lo tih a chiang tawh tih tun hnaia Press conference-ah an sawi chhuak.

August 20, 2018 khan Mizo Hnam Rûnah MNF President chuan MNF sorkar hunah Mizo mipuiin vai buhfai aiah Mizo buh an rin zawk tawh tur thu a sawi. October 17, 2018-a Aizawl East-II MNF Workers' Meet-ah MNF President-in sorkarna an chan chuan Aizawl khawpui chu motor parking-a harsatna awm lo, traffic jam awm lohna state capital awm chhunah an siam dawn tih a sawi. 2018 inthlan dawn khan Zonet TV-a interview-ah MNF President hian kawng chhawng siam dan tur chipchiar takin a sawi a, June 6, 2013 khan Aizawl South-II MNF Block Conference-ah kawng chhawng siamna tur hian, "Kulikawn aṭanga Chanmari inkar hi target hmasak kan tum ang,” tiin a sawi tawh bawk. SEDP-ah Rs 3,00,000 mipui pek an tiamna video-te chiang takin a la hmuh theih bawk a ni.

MNF hian kum 2018 inthlan dawn khan tlin an duh em avangin a taka tih theih loh an lo tiam a nih chuan tiam nawn leh tawh lo se a ṭha hle ang. An thil tiamte hi tihhlawhtlin loh a tam hle mai a, hetianga mipuite kan bum ṭhin hi thil ṭha lo tak a ni. Hetih lai hian MNF ni lo, sorkarna lo chelh tawhtu dang pawhin inthlan dawna an thutiam hi an hlen lo fo tawh bawk a ni.

Inthlan a hnai a, political party hrang hrangin thu an tiam leh dâwn a, a taka tihhlawhtlin theih loh tur chiang tak intiam hi sim tlang ila, vote kan zawng a nih pawhin dik leh fel takin i zawng ang u.