PAHOSS kalpui dan
Urban Development & Poverty Alleviation (UDPA) changtu deputy chief minister chuan, khawpuia lirthei hunna tur siamna Parking House Support Scheme (PAHOSS) hnuaiah cheng nuai 6,171 pek chhuah a nih tawh thu House a hrilh. Kum 2020-21 budget-a PAHOSS atana cheng vbc. 10 dah chu Lunglei, Champhai leh Kolasib atan ruahman a nih thu a sawi.
Khawpuia lirthei pung zel avangin Aizawlah lirthei tlan hleihtheih loh khawpin kawngpui a tawt ta a, hun, ṭha leh sum tam tak khawhral ṭhin a ni. Traffic jam tihrehna turin lirthei hunna tur sorkarin siam a tum a, sum tam tak a pe chhuak tawh a ni.
Kan state khawpuia PAHOSS kalpui tum dan hi a bul ṭan dan ṭha viau mah se, a kal rei tawlh tawlha a duangtute leh a ngaihtuah chhuaktute duh dan piah lamah an kalpui ṭan emaw tih palh a awl ta hle a, sorkar aṭanga hamṭhatna dawnna anga ngaiin 'ruling party' mi leh sâ ṭhenkhat chu an insawipui nasa ta mai.
PAHOSS hi a duangtu lam chuan khawpuia lirthei pung chak avanga traffic jam tihziaawmna lam an ngaihtuah ber laiin, ruling party zingah party mi leh sâ induhsakna tur emaw ti pawl an awm a, chu mite nawrna avang nge, a duangtu lam an
ṭang zo ta lo zawk nge, tunah chuan a hmun nei ṭha lam aiin ruling party mi leh sate duhsakna angin a kal thui ta hle a, a zialo takzet a ni.
Mizoramin sum a nei lo a, kan sorkar hnathawkte hlawh pawh puk lailawk a ngai ta hial a, chumi karah pawh chatlak loa uar taka kalpui PAHOSS kalphung hi mipuiin an thlir reng a, political party rimnamin a kal tawh nge tawh lo tihte an chhinchhiah ngei ang.