Ruihhlo chungchanga inzirtirna

Deputy Chief Minister Chuan Mizoramah ruihhlo a hluar avangin chhungkaw tam takin an tuar mêk tih a sawi a, ruihhlo la khawih ve lote invenna turin chhungkaw tina inzirtir a pawimawh thu leh, chhung tinin mawhphurhna kan neih thu International Day Against Drug Abuse and Illicit Trafficking hmannaah a sawi.

Khawvel pum huapa hman ṭhin ni bîk chi hrang hrang a awm a, heng zingah hian ruihhlo dona ni hi Mizorama hman inhmeh ber pakhat a lo ni ta mai hi a pawi hle a ni. Ruihhlo do ni hi uar zawka hman ngai khawpin ruihhlo hi a hluar zual zel a ni ber a, chhungkaw tam tak luhchilhin harsatna a thlen mêk a ni.

Ruihhlo hi tih rem tumin sorkarin theihtawp a chhuah a, khawtlang mipuiin ṭawiawmin hlawh pawh phût loin zan khaw teirek thlengin an venpui a, chuti chunga an tih theihtawk chu tuna kan dinhmun hi niin a lang. Heti a nih chuan ruihhlo lut tur ven lamah chuan beisei a sang lo tawlh tawlh a, beidawn erawh a hun lo ang.

Ruihhlo dona kawnga chhungkaw tinin kan tih theih chu mahni chhungkua ṭheuha uar zawk leh ṭha zawka inzirtir hi a ni a, a ruihhlo tihbo lamah sorkarin beisei a phak lo deuh a nih pawhin, ruihhlo ti lo tura mahni chhungkua ṭheuh inzirtirna lamah tal ṭal la zual ila, ruihhlo do kawngah I ṭang rual ang u.