Restricted tender leh Mizoram
PWD changtu chief minister Zoramthanga chuan ZPM member C Lalsawivunga zawhna ziaka chhangin, kum 2009 aṭanga August 31, 2020 thlengin restricted tender hmangin hna 53 pek a nih thu a tarlang a, "CPWD Works Manual 2014-in a phal angin hna hmanhmawhthlak vang leh thawk tura thiam bik leh hmanraw nei sa thlante hnenah tender koin, chu'ng zinga chháng hniam ber hnenah pek ṭhin a ni," a ti.
Mizoramah hian hmasawnna tur sum kan mamawh tawk tur hi a lut lo a ni bik lo a, a hman dan a fel tawk loh avangin he state hian kawng tam takah kan ṭhenawmte kan phak ta lo hle. Hei hian chhan hrang hrang a neih zingah hmasawnna ruhrel (infrastructure) dinna kawnga induhsakna hleihluak awm hi a chhan lian tak a ni ngei ang.
Tunah chuan Mizoramah hian political party lama mi challang deuh chin hi chu 'contractor' an ni ta deuh vek mai a, anmahni hminga hna an thawh loh pawhin contractor lian sate hming hawhin hna an thawk ṭhin. Heng mite'n hna an thawh theihna tur hian dan awm sa chu thiam taka hmangin 'restricted tender' tiin an duhsak zawngte hnenah hna hi a pekin an pe a, heng mite hi a taka hnathawktu ni lem lo tam tak an awm a. An hna hmuhte an hralh chhawng leh a, a ṭhenin hming an hawhsakte an thawhtir bawk a, a rah chu mipuiin a chhe zawngin kan seng mek a ni.
Congress-in sorkarna vawnfung an chelh chhung khan kil tinah 'restricted tender' tih hi kan hmu a, MNF-in an han thlak a, thil a danglam chuang lo. Kum 2009 leh kumin August thla inkarah hian PWD hian 'hna hmanhmawhthlak' engzat nge an neih a, an mi thlante hi 'thawk tura thiam bik' an ni nge ni lo tih hre chiangtu chu engineer-te leh helam ngaihven deuhte hi an ni ang. A hmutu hre tur chiang sain tender an chhuah a, mahni lam hnaite duhsakna remchangah hmasawnna hna hi kan chhuah a, chu chuan kan ram hmasawnna tur tam tak hi a tiṭhuanawp a, a tawpa a tuartu chu ram leh a chhunga cheng mipuite kan ni.