LSC lem hmanga inbumna

Mizoram Police chuan thuchhuah siamin, ram hman hawh chungchang inbumna a hluar chho tih an tarlang a, fimkhur turin mipui an ngen a; ram lei leh hralh chungchangah te, mi ram hman hawh chungchangahte inbumna a hluar chhoh zel avangin mipuite fimkhur turin min ti.

Mizoramah hian in hmun leh ram zawrh leh hralh dan mumal tak hi kan kalpui mang lo a, dan anga lei leh hralhna kalpui an la tam loh avangin inbumna pawh hi a hluar niin a lang.

Thiamna a san tawh avangin hei tak hi mi sual leh mi bum hmangte pawhin an hmang ṭangkai a, thil chinchang hre lo zawkte leh mi mawl zawk nia langte bum tumin an veh reng a, a pawi hle a ni.

A bumtu lamin thiam tak leh zei taka thil an kalpui avangin bum tur hi an hmu leh ṭhin a, chhungkaw tam takin harsatna an lo tawh phah tawh a, an neih zawng zawng nena LSC lem leite pawh an awm tawh ṭhin a, a vanduaithlak takzet a ni.

Police-in mipuite an zirtir ang hian in hmun leh ram lei hi fimkhur a ngai a, mi tam takin bum an lo tawh tawh ṭhin avangin zirtirna uluk leh ṭha zawka kalpui a ngai a; mipui nawlpui hian hriat awm takte hi kan hriat loh fo avangin bumin kan awm leh ṭhin a, police leh thuneitu lamin mipui zirtirna uar zawkin kalpui thei se a lawmawm hle ang.