Sorkar hian risk fuh hlauh se

Cheif minister leh Horti­culture enkawltu ni bawk chuan, SEDP hnuaia mau/rua chin tura thlan Brandisii leh Latiflorus-te chu National Bamboo Mission (NBM)-in sumdawnna atana chin tura a tih zingah tel lo mah se, heng mau/ rua hmang hian Mizoram sorkarin risk an lâk tur thu Assembly House-ah a sawi. 

Mizoram sorkar hian flagship prog­ram SEDP a nei a, chumi hnuaiah chuan mau/ rua hi a thupui ber niin kan chief minister ngei pawhin uar takin a sawi ṭhin. Mizoram chu mau/ rua hmanga intodelha siam a tum a, chumi atan chuan mithiamte nen mau ṭha chi Brandisii leh Latiflorus-te chu Mizorama chin turin an thlang fel tawh a ni. 

Mi thil chik miten an han thlir zau deuh a, India rama mau/ rua buaipuitu pawl NBM chuan kan raw chin tura thlan chhuah hi sumdawnna atan an lo thlang ve hauh lo mai a, mi ṭhahnemngaite ngaih a ṭha lo a, Mizoram pawisa hi thil hlawhtling tak tak tur ni loah a luang ral mai mai ang tih an hläu a ni. 

Chief minister erawh chuan NBM-te pawhin an hre vek bîk lo a, tuna Mizorama chin tura thlan chhuahte hi a hlawhtlin ngei ringin an kalpui dâwn a, chumi kawngah chuan 'risk' an lâk thu a sawi. 

Khawvela mi hlawh­tling tam takte hi huaisen taka 'risk' la ngam an ni a, kan chief minister pawh hian heng mau/ ruate hi hlawhtlinpui ngei inbeisei chungin risk an la tih a sawi. Mizoram sorkar hian mau/ rua a thlan hi risk fuh se, hlawhtling ngei se, Mizoram dinhmun khai chhuah­na atan hmang ngei thei se a duhawm ngawt mai.