Remna ni

Vawiin June 30 hi India sorkar leh MNF-in inremna an siam ni, Remna Ni vawi 38-na a ni a, Mizoram hmun hrang hrangah he ni lawmna hun hi buatsaih a ni ang.

Remna Ni hi Mizote tana ni lawmawm leh chhinchhiahtlak a ni a, Mizote tana a hlutna hi a sang hle a ni. Rambuai laia Mizo mipui nawlpui tawhna nasatzia te, hnam sipaiten nunna an chân nasat dan te, ram hmasawnna tur a ṭhuanawp dan te, zirna in mai bakah Pathian biak-in hial pawh hun rei tak khar a ṭul ṭhin dante leh, kan hun tawn hrang hrangte ngaihtuah khan, remna leh muanna a awm theihna tura tha thawhtute zawng zawng hi an chhuanawmin Mizote tan an hlu hle a ni.

He Remna Ni hi kum dangah chuan politics thil avanga inrem lohna ni ang maiin a lo thang tawh ṭhin a, remna a awm theihna tura thawh hlawk ber nih tumin political party lam an intlansiak chângte a awm hial a, a zia lo ṭhin hle a ni.

He ni lawmawm tak mai hi lawm mumal loh kumte a lo awm tawh ṭhin a, kuminah erawh sorkarin a lawmna programme hrang hrang a buatsaih nasa hle. Kum danga Remna Ni puala hun an hman ngai lohna thil hrang hrang buatsaih a ni a, heti taka sorkarin he ni a ngai pawimawh thar hi a lawmawm a, he ni lawmawm tak lawmna hi kum tin ropui takin chhunzawm thei se a duhawm hle a ni.