Sorkar hian nuai 100 hi ngawih bopui suh se

MPYCC chuan Assembly Speaker Lalrinliana Sailo-in Deputy Chief Minister Pu Tawnluia chan department-ah cheng nuai 100 ziah bo sawi chungchang chu chhui chiang turin Deputy Chief Minister leh Chief Minister an phut.

Cheng nuai 100 bo chungchangah inpuhna lian tak a awm a, a inpuhtute pawh hi Mizorama mi pawimawh ber ber an ni. Eptu party lamin an puhna pawh a ni lo a, tun ṭuma mi hi chu Assembly Speaker meuhin Deputy Chief Minister hnuaia department pakhata cheng nuai 100 ziah bo a sawina a ni. Video chiang takin a awm a, hei hi chhui chian a, a nihna hai chhuah a nih loh chuan mipuiin MNF hi an hnawl phah ang tih pawh hlauhawm tak a ni.

Cheng nuai 100 ziak boa inpuhna pawh ngawih bopui hmak thei kan nih tawh chuan, kan ramah hian eirukna a hluar hle tiin a sawi loh theih loh a, cheng nuai 100 chungchanga inpuhna awm hi Mizoram sorkar hruaitute hian an chhui chiang ngei tur a ni.

February, 2022-ah mai khan Assembly Speaker hi Ngaizawl kawng laihnaah cheng nuai 100 eia puh a ni tawh a, eptu party chuan hetianga sum eia an puh Assembly Speaker rorelna hnuaia awm hi an duh lo a, Assembly House hial an chhuahsan tawh a ni. Hetih laia cheng nuai 100 eirukna bawk a lo ri chhuak leh ta hi thil mak danglam tak a ni a, tun ṭum chu Assembly Speaker hi a puhtu a ni thung a; heng cheng nuai 100 bo thlau chungchang pahnihte hi sorkar hian kum 2023 MLA inthlan hma ngei hian chhui chhuak ngei rawh se.