Kohhranah politics inzirtirna

Mizo Theological Association (MTA) chuan tun hnai khan Mission Veng Kohhran Hall-ah Biennial Conference an hmang a, 'Political Education' tih thupui an zirho. MTA hi kohhran pawl hrang hranga Pathian thu zir chhuakte telna a ni a; an inkhawmpuiah hian MTA member-te bakah, kohhran pawl hrang hrang hnuaia Pathian thu zirna sikul/college aiawh te, Mizoram People Forum aiawhte leh college ṭhenkhat aiawhte an tel.

Mizoramah kohhran hrang hrangin Political education hi an lo kalpui tawh ṭhin a, a hlawhtlinna pawh kan hmu chho mêk. Hetihlai hian politics nihna hre fuh loa politics hi thil chhe lam sawina emaw la ti tlat, politician chu mi dik lo awmkhawm emaw ti tlat hi kohhran hruaitu zingah hian an la awm niin a lang a, inzir belh zel kan la ngai hle a ni.

Politics siam ṭhat hna kalpui kan tum mek lai hian politics nihna zir chian a, chumi hmanga thil kalpui hi a ṭul takzet a, tun hmaa politics kan kalpui dan fuh tawk lo avanga politics-a inhmangte kan hmuh dan fuh tawk lote pawh kan siam rem hret hret aṭul ang.

Politics hian chhungkaw tin a nghawng a, kan zavaia min khawih avang hian kan duh emaw duh lo emaw kan zir chian hi a ṭul takzet a, politics kalpui dan fuh tawh lo aṭanga insiam ṭhaa kan tal chhuah a, politics dik kan hriat fuh a pawimawh hle ang.

Kohhran mi leh Pathian thu zirtuten Politics an zir chiang hi a lawmawm a, Politics kalpui dan dik hi zirtir chhawng zel thei se, ram tan a ṭangkai dawn hle a ni.