Ran lakluhah fimkhur a ṭul

Serchhip district-a Thinglian khuaah ran natna vangin tun hnaiah kêl 150 a thi tawh. Kêl thih chhan hi MLA Fund aṭanga an dawn, Assam aṭanga kêl lakluhte'n hri an kài vang a ni a, an inkai chhawng ta zel a ni.

Thinglian khuain an MLA duhsakna dawnga an intodelh theihna tura kel an dawng hi an lawmpuiawm a, chutihlaiin an kel dawn thar aṭanga khaw chhunga ran hri a lêng hi an lainatawm hle a ni. Thingtlang khaw lian lem lo niin kel vulh ṭhang an ni a, vanduaithlak taka an kel vulhsa leh an neih tharte a pùl ta hi a pawi hle a ni.

He thil thleng aṭang hian sorkarin zir tur a nei a, state pawn leh ram pawn aṭanga ran lakluh a fimkhur a ṭul hle a ni. Hmun dang aṭanga dan loa vawk lakluh aṭangin a pul hri a lêng tawh a, chhungkaw tam tak eizawnna a chhiat phah tawh. Chutihlaia sorkar sem ngei mai kel lakluh aṭanga a pul hri a leng ta mai hi sorkar thiam loh a ni a, tun hma pawhin sorkarin ran vulh tur a lakluh zingah hri ṭha lo kai an lo awm tawh ṭhin. Hetiang thil hi a thlen nawn tawh lohna turin ran lakluh tur hi a tirah an hriselna dinhmun enfiah vek ni tawh rawh se.