Assembly Secretariat hna lak

Tun hnaia Assembly Secretariat hnuaia thawktu laknaah induhsak bik vanga thawktute vua leh vâng lâk an awm, tih thâwm awm chu MZP chuan an chhui chiang mek tih an tarlang a; MSU Gen. Hqrs hruaitute pawhin he hna lak chungchangah hian thil dik lo a awm nia a lan avangin, Deputy Chief Minister hmuin thil awmsa chhui chiang tur leh, dan loa thil kalpui a awm a nih chuan a tidik lotu hrem turin an phût.

Assembly Secretariat hnuaia hnathawktu lâk hi tun hma deuh aṭang tawhin sawi a kai ṭhin a, anmahnia inrelbawlna hranpa nei an nih avangin thuneitu tan duhsak zawng indah luh a remchang bîk niin an sawi a, tuna thawktu awm zingah pawh tun hmaa Speaker leh Deputy Speaker bakah thawktu lian chhung leh khat an awm nual anga sawi a ni. Heng mite hi an thiamnain a tlin avanga dan dik taka lâk an nih chuan thík chi a ni lo a, a tling zawkte hnawla induhsakna avanga lut an nih chuan a fel lo hle ang.

Tun hnaia Assembly Secretariat-a hna lam danah hian sawi tur thil a awm a ni ngei ang; sawi a hlawh thar leh hle a, zirlai pawl pahnihin an ûm zui tawh chuan a fel fai vek lo ang tih rinna a lo piang. Chuti a nih chuan Mizoram sorkar inrelbawlna hmun pawimawha thawktu tur a nih avang hian, dik zawk leh ṭha zawka hna lak dan dap ni se a ṭha ang.

Mizoramah hian mahnia inrelbawlna nei hrang zinga hna lakah sawi neuh neuh a awm ṭhin a, tun hma deuh khan Mizoram University hnuaia office hnathawktu lâk dan pawhin sawi a lo kai tawh a, chhung leh khat induhsakna kalpui tia puh a lo ni tawh. Assembly Secretariat-ah pawh hian thuneitu lian lam chhungte hi an vannei leh ṭhin a, an thiam vang leh tlin vanga lak an nih loh palh chuan chhui chian chu a ṭha hle ang.