Tui connection pek leh tui dinhmun

PHE chuan Mizorama thingtlang khaw 89%-ah tui connection pek a nih tawh thu tun hnaia tui sem tihchangtlun dan tur an zirhonaah an sawi a, khawpui (urban town) 28-ah hnianghnar takin tui pek a nih tawh thu an sawi lang bawk. Hetihlai hian Aizawl khawpuiah mipui khamkhawp tui an la pek theih loh thu leh, Mizoram mipui 28% vêl zet an awm avangin tui mamawhna a san thu an sawi.

Aizawl khawpuia tui kham khawp kan hmu lo hi thil mak a ni lo a, mipui pun chakzia leh tui hna kàm chakzia en hian thil thleng tur réngah a ngaih theih. Hetih lai hian tui indaih lohna hi a nasa ta hle mai a, thuneitu lamin beng sika an ngaihtuah a ngai ta.

Tun dinhmunah Mizoramah thingtlang khaw 89%-ah tui connection pek a nih tawh thu report a awm a, hetih lai hian tui hnianghnar takin an pe chhuak thei ang em, tih erawh thuhran daih a ni. Sorkar laipui ruahmanna angin JJM hnuaiah sum ṭhahnem tak dah niin tui connection hi buaipui a ni a, tui connection neih tluk zeta pawimawh chu tui thianghlim hnianghnar pek hi a ni a, hemi kawngah hian sorkar a ṭan lehzual a ngai.

Aizawl khawpui chawmtu lui a kám zel a, mihring an pung zel bawk si a, tui mamawh zat pek theih hi thil harsa tak a ni ang a, thil theih loh erawh a ni lo ang. Tun dinhmunah hi chuan chhungkaw tak takin fur lai pawhin tui an lei a ngai a, ṭhalah phei chuan tui zuarte an indaih lo hial a, kan state khawpui ber hi a tui a hál a ni ber mai.