Assembly Secretariat hna lâk

MZP leh MSU huaihawtin Mizo ṭhalaite leh zirlaite chu Mizoram Assembly Secretariat hna lak dan duh loh avanga hna lak cancel ngiatin, lungawi lohna lantirin Assembly House tualah an pungkhawm a, he hna lâk hi sût ngei turin sorkar an nawr a, an sût hma chu nawr chhunzawm zel an tum.

Tun hnaiah Assembly Secretariat-ah thawktu hrang hrang lâk thar a ni a, a kalphungah thil fel tawk lo a awm ngei nia rinhlelh turin a tlingte hi Assembly Speaker lam hnai leh Assembly Secretariat-a hna pawimawh thawktute lam hnai an ni deuh fur. Hna tam tak lâk zingah duhsak zawng pahnih khat thun hi chu a lo awm tawh ṭhin ngei a, tuna hna lâk kalphung en hi chuan an duhsak zawng thunna remchangah an hmang a ni ber a, a pawi hle a ni.

Mizoramah hian sorkar hna hi 'hna' ni bika kan hriat avang leh hlawh a ṭhat avangin ṭhalai tam zawkte hnathawh tum ber a ni a, chutihlaia he hna an lâk dan hmuh hi chuan a lungawithlak loh hle a ni. Mizoram mipui, a bikin ṭhalaite zah lohna lian tak niin a lang a, hei hi an sût lo a nih chuan nghawng ṭha lo tak a nei ang tih a hlauhawm hle a ni.

Mizoram sorkar pawhin heti taka induhsakna awm nia lang hi a kaltlangtir duh ring lo ila, he hna lâk hi an sût lo emaw, a tling tawhte Court-ah kala an chak a nih ngat chuan, Sorkar tan chuan mualphona tawp a tling ang.