Dan loa thil tawlh rukna Mizoram

Mamit district chhung khawthlang lam, Bangladesh nena inrinaa ramri vengtu 90th Bn. BSF sipaite chuan tun hnai khan dan loa tawlh - silai, AK-47 rifle 28, AK-56 rifle leh carbine pakhat ve ve leh, silai mu tam tham tak an man a; rinhlelh mi pathum an man bawk. BSF hotupa chuan silai mante hi Myanmar lam aṭanga rawn kal nia an hriat thu a sawi.

Mizoram hian Myanmar leh Bangladesh nen international border thui tak a neih avangin dan phal loha thil tawlh ruk hi man a ni fo tawh a, tun hi an man hnuhnun ber pawh a ni kher lo ang. Ruihhlo, silai, rangkachak leh dan phal loh thil dangte pawh tawlh ṭhin a ni a, thil ṭhenkhatte phei hi chu mipui pawhin kan ngaizam a, a tawlhtu lam pawhin dan bawhchhia an ni tih inhre lo ang maia ualauin an tawlh ṭhin.

Hetihlai hian kan sorkar hian ṭan a lak thar nasat a ṭul a, silai heti zat man a nih chuan man loh eng emaw zat a awm ngei ang tih a rin theih a, hetiang hian Mizoram hi silai tawlh rukna hmunah an lo hmang fo tawh pawh a ni thei. Covid-19 hri lenlai a ni a, dan ang chuan ramri kharlai a ni a, chuti chunga silai hial pawh an tawlh ru zel a nih si chuan hri len lohlai phei chuan hetianga dan loa sumdawnna hi a hluar hle ang tih a ngaih theih a ni.

Myanmar leh Bangladesh ramri zawng zawngte hi ven sen a ni lo a, sum tam tak hlawhna tura thil tawlh ruk tum rân na na na hi chu dan hleihtheih an ni kher lo ang. Hetihlai hian ualau taka dan bawhchhiatna awm ṭhin leh, state dangte pawhin min rawn ena 'dan loa thil tawlhruk hluarna state' tia min kawh zui mai lohna tur tala ṭan lak a ngai a, tunah hi chuan dan loa thil tawlh rukna kawngah hian kan ram dinhmun hi a him lo tak zet a ni.