Assembly hna lak versus restricted tender

Mizoram Assembly Secretariat-a hnathawktu tur tun hnaia an lakah chuan thil fel lo a awm ngei nia hriain zirlai pawlin he hna lak hi sût leh an phût a, sorkarin zirlai pawlte thil phût hi tihhlawhtlin a tum dawn.

Assembly Secretariat hna lak thar ber kha kan en chuan Speaker vua leh vang ki ṭhahnem tak an tling a, chu bakah chuan Assembly Secretariat lama thawktu lian vua leh vang tling an awm hlawm bawk. A lan dan mai chuan thil lang tlang leh fik taka kalpui niin a lang lo a, exam hmachhawn ni se tute emaw lam hnai an tling rual ṭhawt mai hi a mak a, a tling tur hi an hre lawk emaw tih mai a awl.

Assembly Secretariat hna lak danah hian a ruh langa sawi chuan tun hma pawhin Speaker chhung hnai hi an tling thei hle a, tuna hnathawktu zingah pawh hian chutiang mi chu an awm fur. Hei bakah hian a thawktu säng deuh chin vua leh vang pawh an tling thei em em a, an thiam bîk vang lam aiin a tling tur hriatsaa hna lakna a ang hle a ni.

He thil hi mipuiin kan vei em em laiin cheng vaibelchhe tam tak kalna restricted tender pawh hi a thawktu tur thlansaa hna lak tho a ni ber a, Mizorama hna lian leh pawimawh tam tak hi sorkarin a thawktu tur a duhzawng a thlang lawk a tih theih a, hei hi ṭhangtharte hian ngaimawh tel se a ṭha hle.