Hnathawktu lâk sût leh thu

Mizoram Legislative Assembly Secretariat-in thawktu a lak tharte 11 chu induhsakna uchuak tak a awma an hriat avanga zirlai pawlten sût tura an phût hnuah Mizoram sorkar chuan a sût (cancel).

Assembly Secretariat hian translator, assistant leh UDC Pakhat ṭheuh leh LDC pariat tun hnai khan an la thar a ni.

He thil hian kan ram kalphung thui tak a hril niin a ngaih theih a, mahni theihna zawna duhsak zawngte sorkar hna ngheta inthun leh hna awm thei anga induhsak hi kan kalpui rei ta hle. Hei hian ṭhalai tam takte a tihelin sorkarah rinna an nghah ngam loh phah a, hei hi a punlun zel chuan nghawng ṭha lo zawk a thlen palh thei.

He hna lak an sût leh hma hian Assembly Secretariat chuab thuchhuah siamin sût leh chi a nih loh thu leh, Court-a an kal chuan dah ngheh zui an nih tho a rinawm thu an lo tarlang tawh a, hei hi ngaihtuah ngun ngai lai tak chu a ni. Zirlai pawlte duh loh ber chu thawktute induhsakna awm nia lang hi a ni a, thawktu lâk an sût ringawt hian Court-ah kalin a ngai bawk hi dah nghet leh ta vek se, heng thil zawng zawng hi awmze nei loin a chhuak palh thei.

Sorkar lam chuan, "Kan sût leh tawh a lawm," tiin kut an lo sil a nih pawhin an sût chhan ber mihring ngai tho kha an thawk nghet leh a nih ngai chuan, Mizo ṭhalaite bawk a tuartu an ni dâwn a, heti maia thil a kal liam lohna turin bawhzui zel a ṭha awm e.