Assam Rifles sawn chhuah thuai an ngai

Assam Rifles-in Zokhawsanga an hmun paltlang an phal loh avangin helaia huan leh lo neitu kuthnathawktute nen tun hnai khan an innawr buai deuh a, mipuiin AR-in Zokhawsang an panna kawng laih chu dan chah tumin JCB nen an thawk chhuak hman a, buaina lian tham chhuak loin inremna an siam thei.

AR-te Zokhawsanga an insawn chhuah hlan hi Mizoram mipuiin an nghakhlel a, chutihlaiin an insawn chhuah tawh chinah harsatna an thlen hi a pawi hle. AR insawn tur thu hi thil thar a ni lo a, hun rei tak chhung buaipui a ni tawh a kum tam tak chhung chu sorkar nen pawh an indawr tawh. Chutihlaia an insawn chhuah fel hma aṭanga mipui nen an inkara buaina awm hi a pawi hle a ni.

Engtikah emaw chuan AR hi an insawn chhuah kim hun a la awm dâwn a, an battalion headquarters building pawh Union Home Minister meuhin a rawn hawn tawh avangin an insawn chhuak ṭep tawh ang. Tuna buaina awm ang hi a thlen nawn tawh lohna turin ruahmanna ṭha tak siam a ngai a, tuna inremna pawh hi khuareiah a ṭha tawk nge ṭha tawk lo tih chhut ngun a finthlak ang.

AR-te hian Aizawla hmun ṭha lai tak an la luah reng a, chuti chungin Zokhawsang lamah harsatna an thlen bawk hi a zia lo hle mai a, Lammual leh a chhehvel hmun hi a rang thei angin chhuahsan fel law law se tih hi Mizo mipui duh dan a ni.