Venpui ngai police?

Hachhek Bial Kuhva Chíngtu Pawl (HBKCP) chuan Zamuanga police checkpost-a duty-te thâ tichak turin chhun zan zawmin an duty ve tawh dawn tih an puang.

Hachhek bialah hian ṭum eng emaw zat chu dan loa kuhva rah phur man an lo ni tawh a, a zia lo hle a ni. Dan loa kuhva rah phurh luh hi smuggling a ni mai lo a, hei hian Mizo kuthnathawktute eizawnna a tihbuai avangin Mamit leh Kolasib District lama mite an buai phah hle a ni.

Hei vang pawh hi a ni mai thei, tun hnaiah kuhva rah phurh ruk hi man chhuah a nihin a khawihtu hriat si lohin a kàng zauh zauh tawh a, lirthei chawpa a kan chang pawh a awm. Hei hi tih luiha hàl ngei niin lang mah se, dan loa phurh luh a nih vang nge a tuartu lam hi an la au chhuak vak lo a, a mak letling hle a ni.

Engpawhnise, kuhva phur ru veng tur hian a bikin police check gate-te siam a ni tawh a, hei hian smuggling hi eng emaw chen veng thei bawk mah se a titawp thei lo. Smuggling a nih miau avang hian a phur luttu lam hian an tum ruh hle tih a lang a, man chhuah palha hàl an tawk chung pawhin an la phur zel hi a mak khawp mai. Chu aia mak chu police check gate a paltlang zung zung ṭhin hi a ni a, police check gate venpui ngaia a lang ta hial hi chu sorkar tán mualphona a tih loh theih loh.