Hna ṭha lo kan tuar

ZPM Ṭhalai Headquarters chuan, Mizoram Law College sak mekah hmanrua an hman leh sak dan a lungawithlak loh hle tih tarlangin, Mizoram sorkar chu zirna ngaihthahah leh sum siamna atana zirna hmangah an puh.

Tun hnaiah sorkar building sak ṭha tawk lo avangin hmun hrang hrangah mipui an phun a, tuna mi hi chu'ng zinga pakhat chu a ni. Sorkar hnuaia hna awm ang angte hi sorkarin a duhsak zawng a pe a nih pawhin a hna tal hi chu ṭha takin thawk thei se, mipui pawhin an ngaidam thei deuh ang.

Tunah hi chuan sorkar hnuaia hna ṭhenkhat hi a chhe lulai deuh a, a viltu engineer lamin hlauh an nei nge an sâ ṭha lo chung pawhin an pawm zel a, a tawpa tuartu chu ram leh a chhunga mipui an ni.

Sorkar hnuaia hian hna hi a la awm dâwn chauh a, India economy ṭha chho zel avangin hmasawnna ruhrel pawh kan la neih belh zel dâwn. Mizoram chhunga mi, Mizo mipuite ta tur Mizo contractor-in chhe lulai taka an sâ ṭhin hian mipui rilru a tina a ni.