CM leh kan ram theihna

International Fund for Agricultural Development (IFAD) hotute leh Chief Minister chu tun hnai khan Mizorama agriculture tih hmasawn dan sawiin an inkawm a, Chief Minister chuan, "Agriculture leh a kaihhnawihah Mizoramin potential (theihna) ṭha tak a nei," tiin, "Kan ramin theihna a neihte hi a ṭangkai thei ang bera hai chhuah a, mipuiin hlâwkna an tel theih nan hmalak thiam a pawimawh," a ti.

Kan Chief Minister hi kan ram theihna hre chiangtu leh chumia rinna nghat tlat mi niin a lang a, hun rei tak chhung chu hetiang lam hawi thu hi a sawi tawh. Mizorama thlai leh thei a ṭhat duh thu te, kan ramin intodelh tura theihna a neih san thu te, mau leh rua aṭang ringawt pawha ram economy chawi kàn theih a nih dante pawh a lo sawi tawh ṭhin a, IAS-te hial pawh an hna bansana mau/rua an buaipui duh hial a rin thute a sawi tawh ṭhin.

Hetihlai hian kan ramah hian agriculture aṭanga ding chhuak sawi tur hi an la tam lo hle mai a, mi tam zawk eizawnna ber a ni chung hian mirethei leh harsa tak tak an la ni hlawm. Mizoram sorkar pawh hian a takin agriculture hi chawi san a tum lo a ang hle a, chumi nemnghehna chu budget lama sum a dah mang lo hi a ni.

Chief Minister hian agriculture lama hmasawn theihzia hi min hrilh rei ta hle mai a, amah ngei pawh kum 14 ṭha chu Chief Minister niin kan ram a lo enkawl tawh a, min thlenpui chin chu tuna kan dinhmun hi a ni. He ram hian theihna a nei tih sawi reng sia tun thlenga agriculture lama hma kan sawn loh chhan hi a ram zir loh lam aiin a enkawltu lam thiam loh a nih hmel a, 1987-a state ni tawh; heti taka agriculture lama kan la hnufual hi tute nge a mawhphurtu ni ta ang le?