Buha intodelh

Chief Minister, "Buha intodelhna tur ram zau tak a awm a, ruahtui dawh khâwl hmangin kumtluanin kan lo leh huante hi ṭangkai taka hman theih a ni," tiin tun hnai khan a sawi.

Kan Chief Minister hian buha intodelh lam hi a buaipuiin a vei hle tih a hriat a, a lawmawm takzet a ni. Amah ngei hian MNF an sorkar hunah chuan Vai buhfai kan rin tawh loh tur thute pawh a lo sawi hial tawh a, hei hi thleng dik chiah lo mah se buha intodelh tumna a nei hrim hrim pawh hi a lawmawm hle a ni.

Hetihlai hian kum 15 dawn Chief Minister a nih tawh hnua kan ramin theihna a neih sanzia a la sawi reng erawh a theihna hai chhuah kawngah a che chak lo hle tih a nemnghet a, kan ram hotupa berin kan ram theihna sawi reng chunga a theihna anga ram a kal si loh chuan thil inhmeh lo tak a ni.

Buha intodelh thei tur hian ram chu kan nei teh meuh mai a, nimahsela kan tlâng ram lo neih dan pangngai hi chhungkaw chawmna atan a hlawk em, tihte zir chian a ngai a, chu ram zau tak kan hman ṭangkai loh chhan pawh kan inzawh ngam a hun ta.

Kan ram ṭhatzia te, theihna a neih san thu te, riah tui dawh khawl theih dante hi sawi sawi mah ila, sorkarna vawn fung chelhtu lamin hma an lâk dan hi tun ai ang lek a nih chuan state intodelh nih hi kan la harsat deuh hmel.