Aizawla leivung paihna

Aizawl Municipal Corporation (AMC) chuan leivûng, in sakna leh ṭhiahna hnawmhnawk leh bawlhhlawh paihna tur bîk hmun a siam a; chungah chuan pawisa chawia paih theih a ni a, lirthei tê (LMV) phur khatah Rs. 100, lirthei laihâwl (MMV) phur khatah Rs. 200 leh lirthei lian (HMV) phur khatah Rs. 300 chawi a ngai.

Leivung paihna hmun mumal tak neih hi thil lawmawm tak a ni a, mimalin a paihna hmun a buatsaih ringawt pawhin harsatna tam tak a phuhruk avangin AMC lamin hetianga ruahmanna an siam hi a ṭangkai hle ang. Khua a pui ve tawh a, bawlhhlawh paih ringawt pawh buaipui tham a ni a, chutiangin leivung paih leh in sakna bungraw ṭâwl paihna tur ringawt pawh hi a hautak hle a ni. Khawpui chuan enkawltu bîk municipal corporation a nei hrang a, tuna AMC hmalakna pawh hi he khawpui mamawh tak a ni.

Hetihlai hian AMC hian heng leivung paihnate hi uluk zawka a vil a ṭul dâwn a, man chawia mipuiin an hman a nih tawh avangin enkawl zui a ṭul hle ang. Fur ruahtui a tlak tam hunah harsatna thlentu a ni nge ni lo tih thlenga vil zui a ngai dawn a, mipui hriselna atana pawi thei a nih leh nih loh pawh enpui tel se a ṭha hle ang.