Reiek tlâng cheina sum

ZPM Ṭhalai chuan, Reiek Tourist Resort tihhmasawnna atana sum ruahman nuai 680 chuang chu mi ṭhenkhatin sum siamna atan an hmang nia an hriat avang leh, sum hman leh hnathawh danah dik lo a awma an hriat avangin Lokayukta-ah chhui chiang tura ngenna an thehlut a; hnathawh dan sawifiah turin Tourism Minister an phût bawk.

Tourism depart-ment hnuaia Reiek tlanga hnathawhte hian sawisel a hlawh hle ṭhin a, cheng nuai 680 chuang sên a ni chungin hmasawnna tur thil thar hmuh tur a tlem hle. He sorkar project lian tak khawih tur hian firm tam tak zinga an thlan hi hnathawh tawh sawi theih nei tam lo tak leh ringhlel duhtu tana rinhlelh kai tak a ni zui a, hna hmanhmawhthlak tak nia lang lo chunga restricted tender hmanga hna an inpe pawh hi a fel tawk lo.

Reiek tlang cheina atana sum ruahman (total estimate) chu nuai 560 a nih laiin, RTI Act tlawhchhana zawhna chhannaah, DJ Consultancy-in pawisa an hmannate chu nuai 447.22 a nih thu leh nuai 82.78 hmanna tarlan a nih loh thu ZPM ṭhalaite chuan an tarlang a, hei pawh hi chhui chian ngai tak a nih hmel.

A beitu lam hian politics-a hamṭhatna ringawt uma mi dang an bei a nih chuan an tidik bîk lo ang a, chutih rualin an thil sawi chhuahte hi a dik a nih ngat chuan Reiek tlâng cheina tura sum khawihtute hi mipui hmaah leh Court hmaah insawifiah rawh se.