MYC-in tha thlah lo se

Mizoram Youth Commission (MYC) chuan Super IAS 2023 Programme Screening Exam result a tichhuak a, exam hmachhawntu mi 365 zingah MYC Super IAS 2023 hnuaia full sponsorship hmu turin mi 11 an tling. Heng mite hi Delhi-a coaching an kalna tur senso chu MYC hian a tumsak dâwn a ni.

Mizoram aṭangin hun rei tak chhung chu central service officer tling an awm ta mang lo a, ṭan lâk a ngai hle a ni. A chhan hrang hrang puh tur kan zawng a, kan educational system kan puh a, kan khawtlang nun kan puh a, sorkar-in state civil service officer-te a duat avangin state pawna thawk turin kan exam ṭha tawk lote kan ti a, social media leh thil dang puh tur kan zawng ṭhin a, puh theih pawh an ni vek awm e.

Hetihlai hian a chhan zawnga inpuh ringawt hian kan harsatna a chingfel thei si lo a, kan rama sorkar hna pawimawh zawng zawng hi state pawn lam miin an awp mai ang tih hlauhthawnna a tam ta hle. Hei vang hian kan sorkar a ṭang a, kan ram leh kan hnamin a mamawhna hriain he thil hi a kalpui ta a ni.

Mi tam takin MYC hi sawiselin tute emaw eizawn-na tura sum awm vak vakah an puh a, nimahsela he thil hian rah ṭha a chhuah chuan ram pum tana thil ṭha thlentu a ni ang tih hi ngaihtuah tel a ṭha ang. Sawiselna karah pawh MYC hi zuai mai lo se, tha thlah loin an thil tih ṭhat tawh hi chhunzawm zel se a ṭha hle.