Manipur buainaah remna palai

Manipur tualchhung buaina chhuah aṭanga ni 77 hnuah a ṭum khatna atan India chu Manipur-a thil thleng chungchangah a ṭawng chhuak ve ta a; tribal hmeichhe pahnih saruaka kawng zawhtir lai video a darh hnuah PM hian a vawi khatna atan Manipur buaina chungchang hi a sawi ri.

Manipur tualchhung buaina avangin mi tam takin nunna an chân tawh a, in leh Kristian biak-in tam tham tak tihchhiat niin eng emaw zat chu hal ral a ni tawh a, hmeichhiate pawh zuah an ni lo. He buaina hi Manipur pawn lama tuar ber leh a nghawng nat ber chu Mizoram hi a ni.

Manipur-a rorel mektu chu BJP an ni a, anni hi NDA leh NEDA lamah Mizorama rorel mektu MNF nen thawkho niin, an Chief Minister leh Mizoram Chief Minister pawh inhre ṭha tak, vawi tam lo meeting-ho tawh an ni. Hei vang tak hian Manipur-a buaina chhuakah hian kan Chief Minister hian huaisen takin hma la se awmzia a neih ngei a rinawm.

Mizoram Chief Minister hi hmarchhaka hel pawlte dawr tur pawhin sorkar laipui hian a lo sawm tawh ṭhin a, remna palai hna a lo thawk tawh ṭhin. Tun hi remna palai thawh hun tak a ni a, India sorkar au eih thei tur pawhin NDA mi leh sâ a lo ni kher hi a remchang ṭha hle ang.

India ram chhunga buaina lian tak chhuak pawh ngaihsak duh lo Prime Minister kan nei hi a vanduaithlak a, Prime Minister be theitu kan Chief Minister hian a ṭul chuan Delhi-ah zuk zin chilh se, a ṭhian hnai Manipur Chief Minister pawh Imphal-ah zin chilh ta mai se a ṭha ang. Manipur buainaah hian remna palai hna thawk tura remchang leh ṭha tak chu kan Chief Minister hi a nih avangin Mizoram aṭanga lehkha thawn leh social media lama demna thu chhuah aiin a taka a pèn chhuah theih chuan awmzia a nei thui zawk awm e.