Sorkar inkaihhruaina zawm thiam ila

Mizoram sorkar chuan October thla chhunga Mizoram chhunga in kaihhruaina tur a tichhuak a, state leh international border-te hawn a ni tawh dawn a; district headquarters-ah zan dar 8:00 aṭanga zing dar 4:30 inkarah pawn chhuah phal a ni lo. 

Covid-19 avangin nunphung a khaihlak rei tawh a, sorkar laipui lamin India economy tlachhe tur venna atan nun­phung pangngaia let leh theih dan tur ngaihtuahin ruahmanna hrang hrang a siam a, state lamte pawh an ruahmanna zawm turin an ti bawk. 

Hman ni deuha thil tih remchang lo deuhte kha tunah chuan phalsak chin a awm ta a, inkaihhruaina khauh tak pawh zawi zawiin thlah dul hret hret a ni ta. Hei vang hian Covid-19 hi a hlauhawm ta lo a ni hauh lo a, Covid-19 hi a hlauhawm dan a la pangngai reng a, chutih rualin fimkhur taka chenpui dan kan thiam a ṭul ta niin a lang. 

Hman ni deuh thleng khan Covid-19 hi 'chenpui loh hram dan' ngaihtuahin sorkar leh pawl hrang hrangin theihtawp an chhuah tlâng a, Mizorama hri a lo luh lohna turin nasa takin ṭan an la a; nimahsela khawvel puma hri lêng a nih miau avangin in dan hleih­theih pawh a ni ta lo. 

Tunah chuan kan duh emaw duh lo emaw kan inhawn zau a ngai lo thei ta lo a, kan luhka neih hrang hrangte pawh tunah chuan hawn a ni ta. Engpawhnise mipuiin fimkhur kan zir tawh a, tun hi fimkhur hun dik tak chu a ni. 

Covid-19 laka kan fihlim theihna turin sorkarin ruahman­na a siam a, hri lêng dona kawnga sorkar kan puih theihna kawng a ni tih hriain, mipuiin theihtawp chhuahin sorkar thupek i zawm ṭheuh ang u.