AR leh Mizote

Assam Rifles Inspector General (East) chuan tun hnai khan Aizawlah press mite a kawm a, Assam Rifles-in Mizo ṭhalaite tan medical leh engineering entrance hmachhawn tura inzirna, coaching centre an din dawn tih a sawi a, a senso pawh AR lamin an tum vek dâwn tiin, "Zirlai khawsak harsa, thiam site tana buatsaih tur a ni," a ti.

Assam Rifles-te hi Mizoramah hian kum rei tak an lo awm ta a, eng emaw laia inhmuh thiam loh deuh chângte awm mah se, Mizo mipuite nen boruak ṭha takin kan chengho a tih theih. An hmunpui pakhat Aizawla Lammual hmun aṭanga suan chhuah chungchang hi politics khelhna remchangah hman a lo ni tawh ṭhin a, an insuan chhuahna Zemabawk lamah harsatna neuh neuh a awm nawm a, chutihlai taka Mizo zirlai tana an rawn pen chhuak tur hi an fing hle a ni.

Sipai hian an awmna khawtlang tana thil ṭha tih hi an tum pakhat a ni a, mipui nena inlaichinna ṭha tak siam an tum ṭhin. Hemi atan hian an hman tur sumte pawh dah a ni a, thiam takin mipuite tan an mamawh dan azirin an sem chhuak ṭhin.

Assam Rifles hian Mizote hi ṭhiana min siam an tum, chumi kawngah chuan kan mamawh angte min tihsak a, amahni beltu NGO-te pawh an lo pui tawh ṭhin bawk.

Tun hnaia Mizo ṭhalaite tana zir zelna tur remchang an siam hi thil lawmawm tak a ni a, chutihlaiin an hmunpui aṭanga an insuan chhuah hun turah erawh an reh rei leh ta deuh a; mipui nena inlaichinna ṭha an siam hi an chhuak tur an muan phahna atan hmang lem lo se a ṭha ang.