Ruihhlo do beihpui thlak a ngai

Champhai District Narco Coordination Centre (NCORD) Committee chu tun hnai khan an ṭhukhawm a, thla khat chhungin Champhai district-ah ruihhlo cheng nuai 522 chuang hû man a nih thu tarlan a ni.

Mizoramah ruihhlo a hluar kan ti ṭhin a, tuna Champhai District-a thil thleng en hian a hluar hle tih hi kan pawm a ngai. Champhai District-a ruihhlo tawlh zawng zawng hi man ni ta se, tuna mi lêt pawh hi a ni thei hial a, chuvangin kan man chhun chhun aṭanga teh hian kan ramah hian ruihhlo a hluar hle a ni.

Mizoram tluka tlawmngai pawlin sorkar a thlawp ṭhatna state hi a awm kher lo mai thei a, a bikin ruihhlo do kawngah Central YMA bakah YMA branch hrang hrang te, VDP leh NGO dangte hi an thawk ṭha tlang hle a ni. Sawi uar duh tan phei chuan hlawh nei loa thawktute hi sorkarin hlawh neia a chhawrte aiin ruihhlo do kawngah an thawhhlawk zawk tiin a sawi theih hial ang.

Tlawmngai pawl chak tak leh inpe takin a pui chung pawhin kan Police leh Excise-te hi an indaih lo hle tih a ni reng a, kan force neih zat aṭanga teh hian tun aia ruihhlo do kawnga ke kan pen chak zawk dan hi a awm ngei tur a ni a, sorkar a chêt a ngai e.