Zofa inpumkhatna

NGO Coordination Committee huaihawtin tun hnai khan Aizawl leh khaw hrang hrangah Manipur-a Zo hnahthlakte tawrhpuina leh thlavâng hauhna atan kawngzawh huaihawt a ni a, police-te chhinchhiah danin mi nuai khat dâwn kawngzawhah hian an tel.

Kawngzawh hian Manipur-ah remna a awm theih nan chak taka hma la tura sorkar laipui an phût bakah, buaina vanga in leh lo chán te, thite leh hliamte zangnadawmna pek an phût.

Manipur lam Zofate tawrhna hi a nasa hle mai a, a nghawng a nat em avangin Mizorama Zofate pawhin kan ngaihvenin kan tawrhpui hlawm hle a ni. Kan unaute natnaah kan na ve a, an harsatna tawhte hi kan lainat a ni tih kawng hrang hrangin kan lantir tawh a, a huhoa kawngzawhin kan lantir a, India leh khawvel hriatah unau kan ni tih kan lantir.

Zofate hi khawvel hmun hrang hrangah ṭhen darh ni mah ila, thisen inzawm kan nih miau avangin ṭhen hran hlen theih kan ni lo a, harsatna kan tawh meuh chuan unau kan nihzia a chiang lehzual a ni.

Tun hnaiah politics thil avangin Myanmar leh Bangladesh lama Zofate'n harsatna tawkin Mizoramah an rawn raltlan a, Mizoram sorkarin a theih ang tawkin a lo chhawmdawl a, mipui pawhin sum leh tha kan thawh nasa hle. Chumi hnuah Manipur-a Zofate chuan Manipur sorkar leh Meitei mipuite avangin harsatna namen lo an tawk ve leh ta a, Zofa an nih avang leh Kristian an nih avangin beih an tawk.

Heng harsatnate hian Zofa inpumkhatna a tinghetzual sauh a, Zofate hi hmun hrang hrangah awm darh mah ila unau kan nihzia a lang chiang deuh deuh a ni.