Kuhva smuggling leh sorkar

July 25 khan Zamuang Police check post-a duty ve Hachhek Bial Kuhva Chíngtu Pawl (HBKCP) mi leh sate chuan kuhva rah ip 14 an man. Ip khatah hian kuhva kg. 80 zel a awm.

Tun hnaiah Mamit district kal tlangin dan phal loha lakluh kuhva rahte phurh ṭhin a ni a, vawi eng emaw zat lirthei chawpa halsak an nih hnuah pawh an la sim lo niin a lang. Tun ṭumah hian kuhva chíngtute hian sawhthing phur truck pakhat chu ringhlelin an endik a, sawhthing karah kuhva rah ip 14 an hmu chhuak a, check gate bulah an hâl nghal a, dan bawhchhetu lam hian an tum ruh hle tih a hriat theih.

Hetiang dinhmuna kan din tawh avang hian Mizoram sorkar pawh a ṭan lehzual a ngai a, police check gate an paltlang fo mai hi chu a zia lo lulai ta a ni. Ramriah lo man chhuak lo se dan phal loha kuhva tawlh ruk hian Mizoram hmun tam zawk chu a paltlang tihna a ni a, ngaihtuah chian chuan a thinurthlak hle a ni.

Assembly House lama kuhva rah tawlh ruk mit an siai thu sawi a nihna kha a rei tawh nen, police lam hian mit an la siai reng emaw tih palh mai a awl a, Mizoram sorkar hian he dan phal loh sumdawnna hi tihtawp a tum tak tak lo anga puh an awm a nih pawhin a mak lo ang.