AR insawn hun tur

Chief Minister kaihhruaiin tun hnai khan Laldenga Cultural Centre sak hna ṭan thuai dan tur leh Assam Rifles-te Zokhawsanga an insawn chhuahna tura thil pawimawhte an sawiho a; he inhmuh khawmah hian Deputy Chief Minister leh Minister dangte pawh an tel.

Assam Rifles awm mêka Lammual hmunah hian Laldenga Cultural Centre sak tur a ni a, a lungphum pawh Union Home Minister-in a hmunah ngei rawn phumin Mizo mipui pawh kan phur hle a ni. Mizote nghahhlelh em em Assam Rifles-te insawn chhuahna tur Zokhawsanga an hmun pawh a hawng nghal a, chutihlaiin tun thlengin an la insawn chhuak lo.

Laldenga Cultural Centre pawh sa ṭan turin April 1, 2023 khan a lung an phum tawh a, tun thlengin sak ṭan a la ni lo. He mi ni veka hawn, Zokhawsanga Assam Rifles hmunah pawh an la insawn lut kim lo a, Lammualah Assam Rifles an la awm zui zel.

Union Home Minister meuhin a hawn hnu leh lungphum a phum hnu pawha Mizote duh loh anga thil a la awm reng hi lungawi a har a, kan ram hruaitute tan pawh a tlawmthlak hle a ni. Mipuiin kan nghahhlelh em avanga mi ṭhenkhatin politics khelhna atana an hman hial tawh chung pawha Assam Rifles an la awm lui tlat hi hriatthiam a harsa a, kan ram hruaitute hian nawr chhunzawm zel rawh se.