Sorkar chèt hun

Hualngohmun khawtlangin an khaw chhung/hnuaia Aizawl-Lunglei World Bank Road chhe lai hnatlanga siam ṭhat an tum leh chumi vanga kawngpui dan an tum chu an ṭhulh. Khawtlang mipuiin hnatlannaa khawih an tum ber - tuihâwk luankawr tihfai, leivûng paih leh kawng chhuat thawm ṭhatte PWD-in an khawih ṭan avangin hnatlang an ṭhulh tih an sawi.

Mizoram sorkar sum neih zat, a mihring leh khawl neih dante en hian state dangte anga kawngpui ṭha tak nei reng thei kan ni lo a, mipui pawhin beisei tawk tur hi chu an hria niin a lang. Nimahsela, kawngpui pawimawh ni si kal hleihtheih loh khawpa chhiaa dah reng mai hi a zia lo a, khawtlangin kawngpui dang chata hnatlan an tintuah hnu chauha sorkar a che hi a zia lo hle bawk a ni.

Hetihlai hian sorkar tan pawh kawngpui chhe lai apiang thawm nghal zel hi thil awlsam a ni bîk lo a, sorkarin sum a neih loh piah lamah thawktu pawh an indaih lo thei a, khawl pawh an nei tàwk lo thei bawk. Hengte hi mipui lam pawhin kan hriatthiampui a ngai ṭhin a, sorkar hna kalpui dan hi chu mipui nawlpui duh aiin a muang hret ṭhin.

Tun ṭuma Hualngohmuna kawngpui chungchangah bîk hi chuan sorkar hian a ngaihthah rei deuh a, kawngpui pawimawh ni si a vil uluk tawk lo a, khawtlangin hnatlan an tintuah hnua an thawk ta sawk sawk erawh thil lawmawm tak chu a ni.