Zirlaibu nei lo zirlai

ZPM Media, IT & Publicity department chuan sikul ṭan aṭanga thla thum a liam hnuah pawh Samagra Shiksha hnuaia zirlaibu a thlawna semah zirlaite pek kim a la ni lo tih sawiin, zirlaibu sem kim thuai turin Mizoram sorkar an phût.

Samagra Shiksha hnuaia zirtirtute hlawh thla thum pek tawh loh chu pe thuai turin an phût bawk.

Mizoram sorkar hian sumah harsatna a tawk tih chu hai rual a ni lo a, chutihlaiin an ngaih pawimawh zawng thil ṭhenkhatah chuan sum hi a awm thei reng tho. CSS a ni emaw, state sorkar khawih hnaah pawh sorkarin a dah pawimawh lamah chuan sum a awm reng a, State matching share pek tur pawh a nei tih chu a takin kan hmu.

Hetihlai hian zirna lama sorkarin sum a nei lo reng mai leh a che muang ṭhin lutuk hi hriatthiam a harsa a, zirlaite khawih bîk zirlaibu pawh a hunah a sem thei lo hi chu a zia lo hle a ni. Zirlaibu sem tlai hi chu kum dangah pawh a awm tawh ṭhin a, chutihlaiin first term exam an zawh hnu pawha zirlaibu an la sem kim lo hi a pawi hle a ni.

Zirna tihhmasawnna leh zirna in thuam ṭhatna atana state dangin an hman PMJVK-te chu zirna atan kan hmang ve 'thiam lo' a ang a, zirna in sak ṭhatna turin rulh leh turin NABARD loan tam tham tak a pukin kan puk a, hna a ṭhat loh avangin Minister hialin thawk ṭha lote bill hrèn a nih tur thlengin a sawi chhuah a ṭul hial a ni.

Sorkar hian thil dangah pawisa a nei lo a, a kal muang deuh a nih pawhin zirlaibu kher hi chu a hun takah a pe tur a ni a, zirlai pawlte au chhuahna tur chi a nih hmel e