Raltlan pui turin ṭanrual a ngai

Mizoram sorkar chuan tun hnai khan ráltlânte tán cheng vbc. 5 a pe chhuak. Hetih lai hian, Manipur buaina vanga sahimna zawnga Mizorama rawn tlanchhiate puihna atan sorkar laipuiah sum dil ṭhin mah se, hmuh a la ni lo.

Manipur tualchhung buaina avangin mi sing chuang Mizoramah sahimna zawngin an rawn lut tawh a, heng zinga a tam zawk hi chhawmdawlna tura hmun bîk siam relief camp lamah an khawsa a ni. Heng mite hi mi tlawmngaite bakah pawl hrang hrang leh sorkarin a theih ang angin a cháwm a, eng tia rei nge a enkawl theih dâwn hriat a ni lo.

Mizoram sorkar hian sum indaih lohna nasa tak a nei chungin raltlante chhawmdawlna tur sum ṭhahnem tak a pe chhuak a, a lawmawm takzet a ni. Kan sorkar hi hripui doin a buai a, hmun hrang hrang aṭanga raltlan lo lut a enkawl a ngai bawk a, a tira a ruahmannaa tel lo thil tam takah a buai hle a ni.

Sorkar pawisa neih zat en hian ṭanpuina sum a dawng a nih ngawt loh chuan raltlan enkawl chhoh zel hi a harsa dâwn hle tih a chiang a, hei vang hian mipui nawlpui hian kan theihna zawnah raltlante pui turin i luang chhuak ang u.