Roreltute hriatthiam an ngai

Health & Family Welfare chuan September 3 khan hriattirna tichhuakin, Vairengte leh Kân­hmuna Rapid Antigen Test (RAT) tih ṭhin chu Sept. 3, 2020 aṭangin tihtawp a nih thu a tarlang. He notification hi nimin September 4 khan sut leh nghal niin, RAT hi kalpui chhunzawm a ni. 

Covid-19 hri leng avang hian Mizoram sorkar hian a thu rel vawi tam a siam ṭha tawh a, zanlai pelha thuchhuah chângte pawh a nei a, mipui nawrna avanga thurel a thlak chang a awm tawh. Heng thil thlen chhan hi Covid-19 hri len vang a ni tih mipuiin pawm thiam ila, sorkar demna tur zawnga kan zawn chuan demna tur tam tak a awm a; nimahsela hripui leng avangin kan dai ngai loh ram kan dai tlang tih hi pawm a ṭha.

Hripui leng avang kan buai a, sorkar pawh a buai hle. Mipui tana ṭha tur nia a rin leh, sorkar sum neih dan mil tawk nia a rinin ro a rel ṭhin. A tirah ṭha viauin lang mah se rel fuh loh tam tak a nei a, a rel tawh sa sût hreh loin ram leh mipui tana ṭha tura a ngaihah chuan a thu a sût leh mai a, hei hi mipui tana ṭha zawk tura an kal vang niin a ngaih theih. 

Hetihlai hian thutlukna ṭhen­khat hi chu sum kaih­hnawih thilte a ni hlawm a, a reltu lam hian an sum bawma sum awm zat hre chungin a ṭha ber an tlin tawh loh avangin a ṭha ber dawta kal tumin ro an rel ṭhin niin a lang. Chutiang taka kal chu an han tum chhin a, Chief Minister's Relief Fund lama sum tam tak lo chhung lut tawh mipui an rawn ṭawng chhuak ṭan a, social media-ah sorkar demna thu a awm ṭak ṭak a, sum nei lo leh inren chunga kal sorkar chu a ṭang tlang ngam lo a, a thu a sût leh chang a awm ṭhin niin a lang.

Mizoram sorkar hian sum leh paiah harsat­na a tawk tih a takin a lang mek a, sorkar inrelbawlna kawngah pawh harsat­na a tawk ngei tih a hmuh theih. Hetihlaia kil khata sum nei awm taka lang a, inren lek lo ang maia an la khawsak reng vang hian mipui tan sum nei lo anga hmuh a har ṭhin a, thil danga sum ren si loin RAT test a han titawp kha an hrethiam lo ni berin a lang. 

Engpawhnise kan zavaiin thil thar kan tawng chho mek a, Covid-19 hian mimal, khawtlang leh ram rorelna thlengin a tibuai a, kan roreltute'n thutlukna an sût fo hi mipui pawhin kan hriatthiam an ngai hle a ni.