Health care sum pek chhuah rel thu hi

Chief minister Zoramthanga kaihhruaiin Mizoram State Health Care Scheme Governing Body chu tun hnai khan an ṭhukhawm a; health care scheme bill pek chhuah hmabakte chu sorkar sum neih dan azirin a rang lama pekchhuah zel ni se, an ti.

Governing Body ṭhukhawm hian Asian Development Bank (ADB) in Mizoram State Health Care Scheme (MSHCS) changtlung zawk kalpuina tura phalna an pek tawh, a taka tihlawhtling tura tih tur tlema zawng la awmte sawiho a ni bawk.

Mizorama mipui ngaimawh lian ber pakhat chu damloten an damloh inenkawlna pawisa an bill thei lo hi a ni. Sorkar hian Mizoram State Health Care Scheme siamin heta inziak lutte inenkawlna senso bill leh theih dan a duang a, chu thil ring tawk chuan mipui ṭhahnem tak an inziak lut a, an pek tur pawisate pawh an pe thlap a ni.

Chief Minister berin Mizorama rorelna in sang berah damloten Rs 2,00,000 thlenga damlo inenkawlna senso SEDP hnuaia an bill theih dan a lo sawi tawh a, mipuiin an ring tawk a ni.

Chutihlaiin tunah hian Mizoram State Health Care Scheme hnuaiah bill táng a tam hle mai a, cheng vaibelchhe tam tak damlo rethei inenkawlna senso hi sorkar hian a ba mek a ni.

Tunah term tawp dâwn lamah health care enkawltute an ṭhukhawm a, a rang lama health care sum pek chhuah an han rel chauh leh, chu pawh chu Mizoram sorkar sum dinhmun thlir chunga pek tur a ni tih an sawi hi mipui bumna rawng a kai lek lek a, Rs 2,00,000 thlenga bill theih tura min tiamtute hian mipui hi an namnul hle tia puh loh a harsa ṭan ta.