Ramriah kan tlawm leh ta em ni?

Vairengte leh Lailapur (Assam) inrìnaa Assam Forest department-te'n in an sak (thawm ṭhat) avanga July 6, 2019-a buaina a chhuah tawhna in sak chu tunah chuan Assam Forest department-in an luah nghet tawh. He in sak avanga buaina chhuak ṭhelh hian Kolasib SP leh Cachar DFO-te an inbia a; Cachar DFO chuan in sak (thawm ṭhat) chu chhunzawm tawh loh a remti a, tunah erawh chuan an luah lum nghet tawh hle a ni. 

Ramri sawi apianga a tawlh zawk state kan ni ta reng mai hi ngun taka ngaihtuah ngai thil a ni. Political party-te inchirh thehna mai mai piah lam, ram leh hnam thil tak tak a ni tih kan hriat a hun ta. Ramri buaina a awm apiangin eptu party lam apiang an pâwr a, ruling party lamin thiam takin ngawih an chuh a, hetiang karah hian a dawih zawkah ṭangin kan tlanchhe zawk ta deuh zel niin a lang. 

Vairengte bula Mizoram ramri hi pawm chin hriat dan a inang lo ṭhin a, chutih rual erawh chuan nikum maia buaina tenau lo chhuah tawhna hmun ngei Assam lamin an luah nghet zui a nih si chuan, Mizoram sorkar tan chuan mualphona lian tak a tih loh theih loh. Sorkar aiawhte kha lo inbe loin buaina kha ama tawp tawpa tawp mai chu ni se a hriatthiam theih a, sorkar official-te an inbiak rem tawh hnua tuna Assam-in buaina chhuah chhan in an luah nghet tawh a nih chuan Assam lakah kan tlawm chu a ni leh ta deuh ber mai.

Assam hian an ṭhenawm state-te nen buaina an nei deuh vek a, Mizoram nena ramri buaina hi chu an tan chuan 'buaina' tia sawi tham pawh a ni kher awm lo e. Keini tan erawh chuan kan chhuah kâ ber leh kan kawng pawimawh ber a ni a, Assam tana an state kilkhawr a ni bawk a, chuti chunga kan tawlh reng bik mai leh a dinchang zawka Assam lam an ṭang ta zel mai hi sorkar hian ngaihtuah se, political party nihna dah ṭhaa a chinfel dan kawng ngaihtuaha ṭan rual hunlai tak a nih hmel e.