Mizoram leiba zat

Indian Express tarlan danin Mizoram chu state sum thawhchhuah, Gross State Domestic Product (GSDP) aṭanga chhûtin India ram State leh Union Territory zingah leiba ngah ber a ni a; GSDP aṭangin 53.1% a tling.

Mizoram sorkar leiba neih zat hian sawi a hlawh a, inhnialna pawh a chawk chhuak a, Assembly House chhungah meuh pawh leiba kan sawi duh dan a inang lo. Tunah erawh chuan India rama chanchinbu lian chuan Mizoram bîk ni loin, India rama state tinte leiba zat an tar chhuak ta a, chutah chuan Mizoram chu leiba ngah ber a nih thu an rawn tarlang ta a ni.

Leiba hi a zat (a mount) lam an chhiar lo a, GSDP aṭanga teh ṭhin a ni a, chu chu Indian Express pawhin an rawn dah dan hi a ni. Mizoram chu India ramah sum ba hnem ber a ni ta a, hei hi thil lawmawm lo tak a ni.

Fiscal Responsibly and Budget Management (FRBM) Act chuan financial year 2024-25 ah chuan leiba hi 20% aia hniama dah turin a ti a; Delhi (National Capital Territory) leiba chu an GSDP aṭangin 2.2% niin leiba nei tlem ber an ni; Odisha leibá 15.75%, Maharashtra leibá 19.0% leh Gujarat leibá 19.5% a ni.

Mizoram hian leiba kan neih tam chhan chu state-in thawhchhuah a neih tlem vang a ni ber a, mahnia thawk chhuak ve lo state ni chunga sum sem thei kan ni ang lawi a, leiba kan ngah dan leh kan sum sem hi chu thil inhmeh ber chu a ni lo.