Covid-19 positive chhuahtir nghawng

September 1, 2020-a Covid Care Centre, ITI, Aizawl aṭanga Covid-19 positive ni chunga chhuahtir aṭanga kái nia puh theih Thingsul Tlangnuamah Mizo pahnih leh hnam dang 15 an awm a; Thingsul Tlangnuam Village Task Force hruaitute chuan Covid-19 positive chhuahtir hruai chhuaktu mi pahnih leh, positive riahnaa hnathawktu mi 15 positive-te chu Covid-19 positive an chhiahtir aṭanga kai a nih an rin thu a sawi.

Covid-19 positive dam tawh nia ngaih, test-na lama la nega­tive lo chunga mi­dangte kai chhawn thei tawh lo tura ngaih an nih vanga mi pariat chhuahtir khan sawi a hlawh hle. Mi tam takin an sawisel a, Health secretary-in koh kir leh vek an nih tur thu a sawi a, Health minister pawhin Assembly House-ah meuh thupha a chawi a nih kha. 

Covid-19 avangin kan ram a buai a, positive zawn chhuah tumin sorkarin sum tam tak a seng tawh a, kan nunphung tibuai vek khawpin positive kan awm lohna turin kan inkhung bawk a ni. Hetihlai hian 'mithiamte'n an ti' tih avangin Covid-19 positive-te chu test-a an negative hmaa chhuahtir an ni a; nimahsela he hri hi zir chian mek leh a ni tela ngaihdan inthlak reng a nih avang hian 'mithiamte' pawh hian thil hi an la hre famkim bik lo niin a lang. 

Tun hnaia Thingsul Tlang­nuama thil thleng hi mi nawl­­­pui thlirna aṭang chuan Covid-19 positive an chhuahtir tak aṭanga kai chhawng hi an ang hle a, a bikin a hruai chhuaktu leh a thlah lehtu pahnihte an positive hian rin­hlelhna a tizual lo thei lo. Heng mite hi Covid-19 positive an chhuahtir tak aṭanga kai an nih leh nih loh finfiah theih ni lo mah se, puh theih tura thil a awm tak avang hian Covid-19 positive an chhuahtir nghawng hi a na hle a ni. 

Engpawhnise Covid-19 hi kan la hriat ngai loh hri a ni a, khawvel pawhin a la buaipui mek a nih avangin tihsual hi chu a la awm pheng phung mai thei a, chumi hre reng chuan tihsual palh theih tur angah hi chuan thil chiang a awm hma chu hmanhmawh tawh lo ila, fimkhur zual zel a ṭha ngawt mai.