Leiba ngah chhan

BJP, Mizoram Pradesh President chuan, Mizoram chu India rama leiba ngah ber state a nih chhan chu Mizoram sorkar kaihruai tawhtute leh kaihruai mektute vang a nih thu a sawi a, "Tun hnaiah Mizoramin India ramah pakhatna nihna kan neih lehna hi a zahthlak leh hle. India ram state leh union territory zinga leiba nei tam ber kan ni mai ni loin kan sang lawr lak. Hetiang dinhmun kan nihna chhan leh a mawhphurtu chu kan state sorkar lo enkawl tawhtute leh, tuna sorkar kan hrawn mekte vanga ni a tih loh theih loh," a ti.

State leiba kan ngah chhan hi chhan hrang hrang a awm thei a, a chhan lian tak pahnih chu thawhchhuah sawi tham kan neih loh vang leh kan neih chhun kan hman thiam loh vang a ni ang. Mizoram hi mahnia intodelh lo state kan nih piah lamah, sorkar laipui aṭanga kan sum hmuh ang ang pawh hmang dik lo leh hmang ṭha lo state kan ni tel a, a zahthlak hle a ni.

Mizote hi mahni intodelh ṭhin, mahni khamkhawp thar chhuak hnam ni ṭhin mah ila, tunah chuan 'kutdawh state' an tih ang dinhmun dik takah kan ding ta. Kan ṭawngkama 'Minister chak' kan tih pawh thawk chhuak hnem emaw, thawk chhuak tura inzirtir ṭhinte ni loin, a sawi chhuak hnem theite hi minister chakah kan ngai ta a, hei hian kan ram dinhmun a tichiang hle ang.

Heti taka leiba ngah kan nih chhan hi kan sum dawn ang chhun chhun pawh kan hman dan a fel loh vang a ni a, sum thawk chhuak zawnga khawsa lo, a pûk theih ang ang pûk state kan ni ta ringawt mai hi tu mawh nge ni ta ang?