Sorkar hnathawk hlawh lâk hun

Mizoram sorkar chuan August 5, 2023 thleng khan sorkar hnathawkte August thla hlawh a la pe lo a; sokar hnathawk nghet ni lo, contract-a thawk leh project hnuaia thawktu zingah hun rei tak tak hlawh la tawh lo an awm.

Mizoram sorkar hian chhuanlam hrang hrang avangin sorkar hnathawkte hlawh hi a lo pe tlai tawh ṭhin a, Covid-19 hluar vanglai phei kha chuan thla tawpa hlawh pek theih chauhte pawh an nei. Kan sorkar sum dinhmun a ṭha lo tih hi tlâng hriat a ni a, chutihlaiin mahni hnathawktu nghette hlawh ngei a huna pek theih loh hi chu a zia lo hle a ni.

Harsatna bîk avanga a hlawh pek tlai ṭumte chu thil awm thei a ni a, tun hnaiah Open Market Borrowing hmanga sum ṭhahnem tak tak a pûk chung pawha kan sorkarin a hnathawkte hlawh a pe chhuak thei lo hi a pawi khawp mai.

Kan Finance Minister ber lah chuan hlawh lak tlai chungchangah an lak hun a tlai a nih pawhin an hlawh zat a ngai reng tih a lo sawi tawh a; pawisa chungchangah chuan thla chawhnu lama hlawh lak hi loan ba mekte, in luah man leh bill hrang hrang pek ngaite tan chuan thil pawi tak a ni.

Engpawhnise, kan sorkar hian a rang thei angin hnathawktute hlawh hi pe chhuak theh ṭhin se a lawmawm ngawt ang.