Environment humhalh

Synod Social Front chuan tun hnai khan ramngaw, nungchate leh tuihna humhalh chungchang sawihona an buatsaih a; environment humhalh pawimawhzia kohhran, sunday school leh ni tin sikulah uar taka inzirtir a ṭulzia an sawi hlawm.

Kan ramngaw leh nungchate humhalh nachang kan hriat loh avangin tunah hian kan tuar mêk a, kan mithmuh ngeiah kan rama kawngpui siamtute chuan kan huan thlai leh kan luite tichhe thei turin leivung an paih pawh kan thlir liam mai mai a ni ber. Kan rama hmasawnna hna thawktute hian dan bàkin leivung an paih a, kan ram nasa takin an tichhia a, mi ṭhahnemngai tlem té an au chhuak tih loh chu a nawlpui hi chuan kan la harh lo a ang hle.

Ramngaw humhalh nachang kan hriat loh avang leh, kan lui kamte kan vah chereu nasat avangin a kum telin tui hna a kang a, a tuartu chu a chhunga cheng Mizote tho kan ni. Mahni ram pawh humhalh thiam lo, a nghawng chhe tak tuar chunga en liam thei kan nih avangin kan ram chhiatnaah hi chuan a mawhphurtu chu kan ni tih hai rual a ni lo.

Tun hnaiah ṭhalai rual zingah ramngaw, nungcha leh lui tuite humhalh duhtu an pung zel a, tui hna a kang chat zo dawna hriain ṭan an la mêk. Kohhran pawh a kàng kai ta zel a, hetianga kan ṭanrual phawt chuan kan ram hi chhan theih a la ni a, kan environment hi siam ṭhat theih a la ni.