Hnathawktute an hah tawh Sorkarin rorel a thiam a ngai

Tun hnaiah Mizoram sorkar chuan Vairengte-a Rapid Antigen Test hmanga mihring lo lutte endikna chu a titawp a, a tuk lawkah kalpui chhunzawm a nih thu a puang. Covid-19 positive-te pawh chhuahtir an ni a, Health minister-in thupha a chawi hial a, heng positive-te hruaitu leh thlahtute hi Covid-19 an positive zui bawk avangin sawi a hlawh hle. Covid Care Cetre, ITI Vengah tun hnai khan damlo enkawlte'n tukṭhuan an dawng lo a, an lungawi lo hle a; hetihlai hian frontline worker zing­ah positive hmuh chhuah an pung zel. 

Khawvelah hripui a leng a, hun rei tak chhung Mizoram hi kan him a, kan lawm hman hle laiin tun hnaiah he hripui vei hi sang chuang zet an awm ta. Khawvel pawhin a la hmelhriat ngai loh hripui a nih avangin a enkawl dan te, a inbuatsaih dante leh a hmachhawn dan pawh hriatthiam a harsa hle tih chu kan sorkar rorel buai nak aṭang hian a chiang a ni. 

Hetihlai hian hri dona kawnga a kûla taia thawktute an hahin an chau tawh hle a, an rorel a fuh hleithei lo a, an chet velnaah tihsual an nei rem rum tawh a, a hmaa fak hlawh ṭhinte khan dem leh sawisel an hlawh ṭan ta. Hetiang boruakah hian a hah berte zinga mite hi a hri kai zingah an tel a, police leh medical worker zingah hri vei an pun belh zel a, kan ram dinhmun hi a ṭha lo zual ṭan hle tiin a thlir theih ang. 

He hun harsa takah hian sorkar hi tawngpawng dem ngawt tur a ni lo a, chutih rual chuan sorkar hian fing taka ro an rel thiam a ngai. Tunah hian hnathawktute hi an rimin an hah tawh hle a, hlawh nei ve lo mipuiin hnatlanga an thawh thiam chin a pêl chho tawh a, hnathawktute'n chhâwktu an mamawh ta hle. 

Sorkar hnathawk zingah sikul leh college zirtirtute hi a âwl leh midangte pui thei ber an nih hmel a, zirtirtu tam takte hi hnathawka koh an ni tawh reng a; sorkar hian zirtirtute thawh thiam tur chi hna ṭhenkhat hi chu awmze neia a thawhtir theih chuan, Health department leh Police department lam hi thui tak chu an chhawk thei ngei ang. 

A zir chhuakin an thawh tur bik hna chu a awm ngei a, chutihlaiin mihring inpe takin an thawh thiam ve tur hna tam tak he hripui dona kawngah hian thawh tur a awm tih chu task force-te ṭangkaizia kan hmuhin a chiang a ni. Sorkar hian a mihring ngai hi a chhawr chho reng a nih chuan kulcho leh chauh hun a awm dawn a, chu chu a thleng chho ṭan mek a, fing taka ro a rel thiam a pawimawh ta hle.