SEDP sem hun

Mizoram sorkar flagship programme, Socio Economics Development Programme (SEDP) hnuaia sum fai sem Phase II thawh khatna chu September thla chhungin sem zawh hman tum a ni. SEDP sem thawh khatnaah hian chhungkaw 60,000 hnenah Rs 25,000 ṭheuh pek tum a ni.

Mizoram sorkarin miretheite lei rem an rah theihna turin ruahmanna a siam a, miin eizawnna bul an ṭan theihna tur leh chhungkua khai chhuah an nih theihna turin SEDP hi 'family oriented' tiin chhungkaw tan an sem mek a ni.

SEDP hi kum 2018 MLA inthlan hma khan MNF party chuan inthlana an tlin chuan an kalpui tur thu an sawi a, MNF party president thusawia a lan dan chuan chhung tin hnena sem tur a ni a, Congress hunlaia NLUP dawng tawh zawng zawng pawhin an dawn vek theih tura ruahman a ni.

MNF-in inthlan hmaa an tiam kha Rs 3,00,000 a ni a, a taka an sem chu Rs 50,000 niin chu chu thawh hnihah sem turin an ruahman a, Rs 25,000 ve vein an sem.

A pawisa faia dawn a ni a, a dawngtu tan thil lawmawm tak a nih rualin an beisei zat nen chuan a inang ta lo deuh.

SEDP hi tun sorkar term chhung hian an sem dawn a nih pawhin term tawp dawn rêta an sem chhan hi sorkarin pawisa a neih loh vang a ni thei a, kum 2023 MLA inthlan dawn hnaiha sem hi an tum lawk hrim hrim pawh a ni thei. Rs 3,00,000 tiama Rs 25,000-a sem erawh an tum lawk a nih hmel loh.