Samagra Shiksha thawktute hlawh

School Education Minister chuan Samagra Shiksha hnuaia thawkte'n thla thum hlawh an lak theih tawh loh chhan chu IFMIS vang a nih thu a sawi.

Minister sawi dan chuan, "Hlawh pek tumin theihtawp kan chhuah. IFMIS-a kan account-ah buai a awm a, central aṭanga sum lo kal cheng vbc. 8.82 in la pe chhuak lo, an ti a, chuvang chuan sum an rawn release duh lo. Keini'n sum hi kan pe chhuak tawh si a, hei hi account-ah a reflect thei lo. An phût zawng zawng kan tihfel hnuah pawh harsatna thar an rawn sawi zel," a ti a; tunah hian Mizoram Samagra sum tur cheng vbc. 350 sorkar laipuiin a hrên khawtlai mek thu a sawi.

Minister sawifiahna hi thu dik a nih ngei hmel a, sorkarin hlawh pek tlai chhana a sawi chu IFMIS hmanga hlawh an pek chhuah tawh vang leh chumia harsatna awm vang a ni.

Chutihlaiin tun hma pawhin Samagra Shiksha hnuaia hnathawkte hian thla tam tak tak hlawh lâk mumal loh an lo nei tawh a, hengte hi IFMIS hman hma lam kha a ni tawh. Khatihlai khan chhan dang avangin hlawh an la thei lo a, tunah chuan IFMIS vangin hlawh an la thei lo leh ta bawk a, an vanduai hle a ni.

Samagra Shiksha-a thawktute hi hun rei tak chhung thawk tawh, sorkarin a dah ngheh hleihtheih loh an ni. Chumi piah lama an thawh hlawh ngei pawh a hun taka an dawng thei lo ṭhin hi an lainatawm a, sorkar lamin ngaihtuah rang thei se a lawmawm ang.